13-01-2020, 12:02
Retroman
142

Канцэрт фальклорнага гурта «Варган» у Магілёве


18 студзеня ў Магілёве адбудзецца выступ фальклорнага гурта «Варган» з Полацка.

18 студзеня 2020 г. (у суботу)
Пачатак у 11:30
Палац культуры вобласці (пр-т Пушкінскі, 7), танцавальная зала

Уваходны квіток – 5 рублёў. Квіткі можна набыць загадзя з 13 студзеня ў касе Палаца культуры вобласці, а таксама непасрэдна ў дзень канцэрта на ўваходзе.

ПРАГРАМА: народныя спевы, музыка, танцы і гульні

Першыя паўгадзіны пройдуць у адукацыйным фармаце – запланаваны абласны семінар-практыкум «Захаванне і папулярызацыя традыцый народнай культуры у сучасных умовах» і майстар-клас «Метады выхавання і навучання ў дзіцячым фальклорным калектыве «Покліч» сродкамі беларускага фальклору».

З 12:30 пачнецца ўласна канцэрт гурта «Варган». Гэта будзе творчая майстэрня – канцэрт-лекторый з пазнавальнай тэарэтычнай часткай ад кіраўніка гурта Вольгі Емяльянчык (дацэнт кафедры гісторыі Полацкага дзяржаўнага ўніверсітэта). Удзельнікі гурта выканаюць народныя песні і інструментальную музыку, прадставяць бытавыя танцы і традыцыйныя калядныя гульні.

Запрашаем да ўдзелу ў гэтай унікальнай падзеі усіх, хто цікавіцца беларускай традыцыйнай культурай і тых, хто яшчэ толькі пачынае з ёю знаёміцца. Можна прыводзіць дзяцей!

Прапануецца вялікая, насычаная праграма, якая працягнецца да 16:00.

Полацкі фальклорны гурт «Варган» аб'яднаў людзей, зацікаўленых традыцыйнай культурай беларусаў. Калектыў займаецца вывучэннем і аднаўленнем беларускай традыцыйнай творчасці: песеннай (як абрадавай, так і лірычнай), танцавальнай, інструментальнай. Прынцыповая пазіцыя ўдзельнікаў гурта - імкненне да пераняцця аўтэнтычнай, арыгінальнай манеры выканання. «Варган» прымае удзел у разнайстайных культурных мерапрыемствах, рэканструкцыі абрадавых дзеяў, праводзіць спеўныя і танцавальныя вечарыны.

Гурт «Варган» выконвае музыку з розных гісторыка-культурных рэгіёнаў Беларусі. Асаблівае месца ў рэпертуары гурта займае спеўны матэрыял Беларускага Падзвіння, запісаны ўдзельнікамі гурта падчас этнаграфічных экспедыцый.

У 2018 годзе гурт «Варган» выпусціў дэбютны альбом «Зялён явар, дуброва. Музыка Полаччыны». У альбоме прадстаўлены песні і інструментальныя кампазіцыі, якія некалі гучалі на тэрыторыі Полацкай зямлі. Альбом выйшаў у межах праекта Традыцыя / Tradycyja.


Калі ласка, прыхапіце з сабой зручны зменны абутак – будуць танцы, у якіх запрашаем паўдзельнічаць усіх ахвотных!

Даведкі па тэлефонах – Палац культуры вобласці: 64-60-77, 77-43-44

Дзякуем за падтрымку Палацу культуры вобласці і Кафэ "ШПАРКI ЛОСЬ" Магілёў



Друзья, оцените данную статью и оставьте свой комментарий по этой теме!

Социальные комментарии Cackle