29-06-2020, 13:15
Natali
411

Прэзентацыя кнігі “Па слядах багоў: нарысы беларускай міфалогіі” Змітра Скварчэўскага ў Магілёве



9 ліпеня 2020 года (чацвер) у 19:00 
 
Музей В. К. Бялыніцкага-Бірулі запрашае ўсіх жадаючых на прэзентацыю кнігі “Па слядах багоў: нарысы беларускай міфалогіі” гісторыка, даследчыка міфалогіі Змітра Скварчэўскага. 

Прэзентацыя пройдзе на вольным паветры ў дворыку музея.

Усім гасцям імпрэзы мы раім захоўваць сацыяльную дыстанцыю і выконваць правілы рэспіраторнага этыкету – умовы для гэтага будуць створаныя.
 
Прэзентацыя кнігі  планавалася раней, 4 красавіка, але была перанесена ў сувязі са складанай эпідэміялагічнай сітуацыяй.  
 
Зміцер   Скварчэўскі – кандыдат гістарычных навук, даследчык міфалогіі і традыцыйнай беларускай культуры, дацэнт кафедры гісторыі Беларусі старажытнага часу і сярэдніх вякоў гістарычнага факультэта БДУ. Сфера навуковых зацікаўленняў – паганства, міфалогія, этнаастраномія, сакральная геаграфія і традыцыйная культура Беларусі. Малады навуковец з’яўляецца аўтарам канцэпцыі стварэння “Музея міфаў” у Бярэзінскім біясферным запаведніку, а таксама канцэпцыі выставы гіганцкіх пясчаных скульптур “Багі і духі Беларусі”. Стваральнік адукацыйнага анлайн-курса “Багі, духі, героі: персанажны код беларускай міфалогіі”.

“Па слядах багоў: нарысы беларускай міфалогіі” – першая кніга даследчыка, якая прысвечана міфалогіі і рэлігійнай традыцыі продкаў беларусаў. На старонках кнігі аўтар выкладае новы падыход да рэканструкцыі супольнасці багоў, якія шанаваліся продкамі беларусаў. У кнізе разглядаюцца дыскусійныя пытанні існавання пантэона, імёнаў, атрыбутаў і характарыстык багоў. На падставе фальклорных, гістарычных і шэрагу іншых крыніц вылучаюцца вобразы тутэйшых багоў, якія адпавядаюць старажытным індаеўрапейскім і з’яўляюцца іх працягам у беларускай фальклорна-міфалагічнай традыцыі.

Прэзентацыя адбудзецца ў фармаце лекцыі, пасля якой у прысутных будзе магчымасць задаць свае пытанні аўтару.

На  прэзентацыі ўсе ахвотныя змогуць набыць кнігу і атрымаць аўтограф аўтара!

ЗАПРАШАЕМ!
 
Месца правядзення:

Музей В. К. Бялыніцкага-Бірулі -
г. Магілёў, вул. Ленінская, 37
Уваход – па квітках. Кошт – 1 рубель. Квіткі - у касе музея.

Пры падтрымцы:

- Суполка «Беларускія народныя танцы ў Магілёве»
- Кафэ «ШПАРКI ЛОСЬ» - Магілёў

Даведкі па тэлефонах:

Музей: (80222) 65-07-57
Каса музея (80222) 65-02-03


Друзья, оцените данную статью и оставьте свой комментарий по этой теме!

Социальные комментарии Cackle